Skulu kommunurnar kunna seta mark fyri, hvussu nógvar dagar ein bústaður kann leigast út til stutttíðarleigu? Tað er spurningurin, tá Løgtingið mánadagin hevur aðru viðgerð av uppskotinum um stutttíðarleigu av bústøðum. Uppskotið gevur kommununum heimild at seta eitt dagatalsmark eftir staðbundnum viðurskiftum. Bústaðir, har útleigarin sjálvur er skrásettur at búgva, eru undantiknir.
Meirilutin í Trivnaðarnevndini, Grímur Sundstein, Bjørt Lind, Magni Højgaard, Sunnvá Dahl Høgfeldt og Sámal Petur í Grund, tekur undir við endamálinum um at gera tað lættari at finna fastan bústað. Tey vísa tó á, at ein eigari við einum dagatalsmarki kann velja at leiga út í teimum mest lønandi vikunum og lata bústaðin standa tóman aðrar tíðir, brúka hann sjálvur ella selja hann.
Stutttíðarleiga seldi fyri 159 milliónir
Sambært tølum, sum Visit Faroe Islands hevur latið nevndini, vóru 1.202 stutttíðarleigueindir í Føroyum í 2025. Av teimum vóru 572 í Suðurstreymoy og 630 aðrastaðni í landinum. Tilsamans stóðu eindirnar fyri 358.912 fólkanáttum og eini sølu á 159,3 milliónir krónur.
Meirilutin sigur, at tølini vísa, at stutttíðarleiga hevur eina munandi stødd. Kortini vantar vitan um, hvussu nógv heil hús verða leigað út, hvussu stóran part av árinum tey verða leigað út, og hvussu nógv av teimum kundu verið nýtt til fasta búseting. Meirilutin vil hava betri hagtøl og viðgera stutttíðarleigu sum part av einum samlaðum bústaðarpolitikki.
Minnilutin vil geva kommununum amboðið nú
Liljan Weihe og Bjørg Brynhildardóttir Egholm mæla Løgtinginum til at samtykkja uppskotið. Tær vísa á, at nýbygging tekur tíð, og at kommunurnar við hesi heimild kunnu royna at fáa fleiri av teimum bústøðum, sum longu eru bygdir, út á langtíðarleigumarknaðin.
Minnilutin vísir eisini á, at tørvurin er ymiskur kring landið. Í summum økjum er tørvur á fleiri bústøðum til fasta búseting, meðan stutttíðarleiga aðrastaðni kann skapa virksemi og halda lív í húsum, ið annars høvdu staðið tóm. Tí vilja tær lata kommunurnar gera mun á økjum, eisini innan somu kommunu. Tær taka undir við eini felags skráseting, men halda, at tað arbeiðið kann fara fram samstundis.
Uppskotið varð lagt fram 5. august av Bjørg Brynhildardóttir Egholm, Sirið Stenberg, Liljan Weihe, Hervør Pálsdóttir, Eiriki í Jákupsstovu og Ruth Vang. Løgtingsmál LM-005/2026
