Løgreglan í Norðursælandi í Danmark sendi í dag nógv løgreglufólk til Lyngby Storcenter, har savnskortahandilin Rogerz varð rændur. Handilin selur millum annað Pokémon-kort og kort úr spælinum Magic: The Gathering.

Vaktleiðarin Thomas Ratzlaff sigur við Ekstra Bladet, at løgreglan heldur, at talan var um upp í fimm fólk, sum øll vóru í maskum. Tey fóru inn í handilin, hóttu eitt starvsfólk við einum luti, sum líktist eini skammbyrsu, og brutu glasskáp fyri at fáa fatur á kortunum.

Sambært DR hevur eigarin sagt løgregluni, at vørur og lutir fyri umleið eina millión krónur vórðu stolnir. Enn er ógreitt, hvørji kort vórðu tikin.

Løgreglan leitar eftir reyðum bili

Løgreglan fær hjálp frá øðrum løgregluøkjum og heitir á fólk, sum hava upplýsingar um ránið, um at seta seg í samband við hana. Hon vil serliga frætta frá fólki, sum hava sæð ein reyðan Mazda av nýggjari slag. Ránsfólkini skulu vera farin av staðnum í bilinum.

Sambært DR varð avbyrgingin tikin burtur um hálvgum trý danska tíð. Stutt eftir klokkan trý boðaði løgreglan frá, at hon í løtuni ikki hevði fleiri upplýsingar um málið.

Í januar vórðu Pokémon-kort eisini stolin í einum ráni í einum privatum heimi í Faxe Ladeplads. Løgreglan metti tá, at kortini vóru verd 300.000 krónur. Tveir sviar eru varðhaldsfongslaðir í tí málinum.

/ritzau/

Løgreglan við savnskortahandilin Rogerz í Lyngby Storcenter sunnudagin. Handilin varð rændur fyrr um dagin. Mynd: Steven Knap/Ritzau Scanpix