Íslendska alifyritøkan Kaldvík hevur fingið loyvi til at ala upp í 10.000 tons av laksi á Seyðisfirði áEysturlandinum í Íslandi.

Hetta er sami fjørður, sum Norrøna hjá Smyril Line siglir inn á hvørja viku, og ætlanin um stóra laksaaling hevur elvt til nógv kjak í lokalsamfelagnum.

Sambært íslendskum miðlum verður skipað fyri mótmælum móti ætlanini í morgin sunnudagin 11. oktober. Mótmæli verða bæði í Seyðisfirði og í Reykjavík.

Mótstøðan millum íbúgvarnar hevur verið stór í fleiri ár. Ein kanning frá 2023 vísti, at 75 prosent av teimum spurdu í Seyðisfirði vóru ímóti ætlanunum um sjóaling í firðinum.

Stúra fyri umhvørvinum

Millum høvuðsósemjurnar er spurningurin um, hvussu stóran váða laksaalingin kann hava fyri náttúruna og umhvørvið í firðinum.

Í eini grein í Vísi vísir íslendski búskaparfrøðingurin Ólafur Margeirsson á, at búskaparligi vinningurin fyri lokalsamfelagið eftir hansara meting kann vera avmarkaður í mun til tann umhvørvisliga váðan, sum fylgir við stórari sjóaling.

Metingin hjá honum byggir millum annað á roknskapartøl og almennar upplýsingar um vinnuna.

Tey, sum mótmæla ætlanini, leggja millum annað dent á náttúruvirðini í Seyðisfirði og óttast avleiðingar av laksalús, dálking og alifiski, sum sleppur úr ringunum.

Fjørðurin hevur stóran týdning fyri Norrønu

Seyðisfjørður hevur eisini serligan føroyskan áhuga.

Norrøna hevur í nógv ár havt Seyðisfjørð sum íslendsku havnina á rutuni millum Føroyar, Ísland og Danmark, og fjørðurin er sostatt ein týdningarmikil partur av føroysku ferðamanna- og farmaferðsluni til Íslands. Tilsamans hava Norrøna, og Smyril, sum røkti siglingina fyrstu átta árini, siglt á Seyðdisfjørð í 51 ár – síðani 1975.

Ein stór aliverkætlan í fjørðinum reisir tí eisini spurningin um, hvussu alivinna, ferðavinna, ferjusigling og onnur skipaferðsla skulu virka saman í sama firði.

Kaldvík hevur fingið loyvi til alingina, men mótstøðan vísir, at stríðið um framtíðina hjá Seyðisfirði langt frá er av.