Heldur ikki í dag eydnaðist tað Áka D. Samuelsen og liðfeløgunum at fáa til høldar ein sigur í bestu svensku fótbóltsdeildini, Allsvenskan.
Á Strandvallen í Hällevik leikti Mjällby í dag javnleik 1-1 móti Degerfors. Mjällby hevði bóltin meira, og teir høvdu væl fleiri málmøguleikar enn útiliðið, men teir dugdu ikki at taka av møguleikunum.
Í 52. minutti legði Degerfors seg móti leikgongdini á odda 1-0. Bert fýra minuttir seinni syrgdi Jeppe Kjær fyri at javna til 1-1.
Martin Agnarsson sat á beinkinum hjá Mjällby allan dystin.
Mjällby liggur fimtaftast í deildini við 23 stigum. Teir hava átta stig niður til næstaftasta plássið, har Örgryte hevur 15 stig.
Hósdagin klokkan 17.45 spælir Mjällby fyrsta dystin í deildarspælinum í Conference League móti Inter D´Escaldes úr Andorra. Talan er um fyrsta dystin nakrantíð hjá Mjällby í einum evropeiskum deildarspælli.
