Valdagurin í Nýsælandi er uttan politiskt valstríð.

Ein serlig lóg bannar royndum at ávirka, hvussu onnur greiða atkvøðu, meðan valið er í gongd. Bannið fevnir bæði um politiskar flokkar, tíðindamiðlar og vanligar brúkarar á sosialum miðlum.

Tað skrivar tíðindastovan AP.

Í staðin er ein siðvenja sprottin fram: Fólk deila myndir av hundum við valstøðini heldur enn politiskar viðmerkingar.

Kunnu fáa stóra bót

Politiski steðgurin varir í 19 tímar og heldur fram, til valstøðini lata aftur leygarkvøldið klokkan 19 lokala tíð. Tað var nøu klokkan seks føroyska tíð.

Í hesum tíðarskeiði er bannað at viðmerkja væntað valúrslit, evni í valstríðnum og annað, sum kann fáa fólk at velja ella lata vera við at velja ein ávísan flokk ella valevni.

Heldur ikki er loyvt at almannakunngera veljarakanningar ella gera kanningar av, hvussu fólk hava atkvøtt, tá tey koma av valstaðnum.

Tíðindamiðlar kunnu nevna flokkar og valevni, men tað má ikki gerast á ein hátt, sum kann ávirka atkvøðugreiðsluna.

Brot kunnu sambært AP geva eina bót á upp í 20.000 nýsælendskar dollarar, svarandi til góðar 74.000 krónur.

Nógv hava longu valt

Atkvøðugreiðslan byrjaði longu síðs í oktober. Hóskvøldið høvdu fleiri enn 1,6 milliónir av teimum nærum 3,8 milliónum skrásettu veljarunum longu greitt atkvøðu.

Tá valstøðini lata aftur, byrjar valnevndin stutt eftir at almannakunngera atkvøðutølini. Sambært Reuters væntar nevndin at hava fyribils úrslit frá helvtini av valstøðunum klokkan níggju føroyska tíð.

Allar atkvøður verða taldar við hond, skrivar AFP.

Millum fremstu valevnini eru forsætisráðharrin Christopher Luxon, sum stendur á odda fyri National Party, og Chris Hipkins, formaður í Labour.

National Party hevur stjórnað landinum saman við New Zealand First og ACT síðani valið í 2023.

Eingin føst freist er fyri, nær ein nýggj stjórn skal vera skipað.

Ritzau/AP/Reuters/AFP