Valstríðstoymið hjá Mary Peltola stevndi fríggjadagin valmyndugleikunum í amerikanska statinum Alaska.

Toymið krevur alt fyri eitt at fáa skjøl útflýggjað, sum vísa, hvørjar brævatkvøður eru vrakaðar eftir miðskeiðisvalið týsdagin, og grundgevingarnar fyri hesum.

Tað skrivar Reuters.

Í nátt vóru bert umleið 600 atkvøður á muni millum Peltola og sitandi republikanska senatorin Dan S. Sullivan. Framvegis verða atkvøður taldar úr fjarskotnum økjum í Alaska.

Við so lítlum muni kunnu brævatkvøður og atkvøðuseðlar, sum skulu flytast við flogfari úr avbyrgdum samfeløgum, fáa avgerandi týdning fyri úrslitið.

Vil hava innlit nú

Sambært valstríðstoyminum bað tað longu 27. oktober um innlit í skjølini. Áheitanin varð endurtikin mikudagin 4. november við tilvísing til reglurnar um alment innlit.

Men toymið fekk noktandi svar upp á kravið um at fáa upplýsingarnar útflýggjaðar.

Í stevningini verður víst á, at tíðin hevur avgerandi týdning, tí uppteljingin framvegis er í gongd, og valúrslitið enn ikki er endaliga góðkent.

Umframt valmyndugleikarnar eru leiðarin Carol Beecher og varaguvernørurin Nancy Dahlstrom eisini stevnd.

Myndugleikarnir siga upplýsingarnar vera trúnaðarligar

Løgmálaráðið í Alaska, sum umboðar valmyndugleikarnar og varaguvernørin, sigur sambært Reuters, at upplýsingarnar verða mettar at vera trúnaðarligar. Ráðið heldur ikki, at lógin krevur, at tær verða almannakunngjørdar.

Valmyndugleikarnir taka framvegis ímóti brævatkvøðum, sum eru greiddar í seinasta lagi valdagin 3. november. Hesar kunnu telja við, um tær koma fram í seinasta lagi 18. november.

Demokratarnir hava sambært Reuters tryggjað sær meirilutan í Senatinum, hóast úrslitini í Alaska og Mississippi enn ikki eru endaliga greið.

Ritzau/Reuters