Ein broyting er farin fram í útbreiðsluni hjá íslendsku summargýtandi sildini seinastu árini.

Sildin, sum vanliga hevur hildið til í íslendskum sjógvi, er í størri mun farin eystureftir, har hon blandar seg við norðhavssildina, sum føroysk og norsk skip eisini veiða.

Tað skrivar íslendska kringvarpið RÚV.

Broytingin merkir, at íslendsk sild í vaksandi mun verður veidd saman við norðhavssildini í havøkjunum eystan fyri Ísland.

Sambært RÚV hava bæði føroysk og norsk uppsjóvarskip fingið alsamt meira av íslendsku sildini seinastu fýra til fimm árini.

Í ávísum veiðum kann íslendska sildin vera upp í helvtina av samlaðu sildini í kastinum.

Tveir ymiskir sildastovnar

Talan er um tveir ymiskar sildastovnar, sum vanliga hava havt hvør sítt ferðingarmynstur.

Íslendska summargýtandi sildin gýtur við Ísland um summarið, meðan norðhavssildin gýtur við norsku strendurnar um várið.

Norðhavssildin ferðast yvir stór havøki í Norðuratlantshavi og hevur stóran týdning fyri føroysku uppsjóvarvinnuna.

Tá hesir stovnarnir blandast í veiðuni, kann tað gera tað truplari at skilja ímillum, hvørjum stovni veiddi fiskurin hoyrir til.

Kann fáa týdning fyri føroyska fiskivinnu

Broytta útbreiðslan er áhugaverd fyri føroysku uppsjóvarvinnuna, tí føroysk skip eru millum tey, sum nú fáa meira av íslendsku sildini.

Men hon reisir eisini spurningar um stovnsmetingar og skráseting av veiðuni.

Íslendsk summargýtandi sild og norðhavssild verða umsitin sum tveir ymiskir stovnar við hvør sínum veiðiráðum og kvotum.

Tí kann tað fáa týdning fyri framtíðar umsitingina av sildastovnunum, um teir í størri mun blandast í somu veiðu.

Enn er ikki greitt, um broytta ferðingarmynstrið er ein varandi broyting, ella um sildin seinni fer at venda aftur til síni vanligu øki.

Kelda: RÚV, 6. november 2026.