- Í løtuni eru øll partrolarapørini til fiskiskap. Skipini fiska upsa og annan hvítfisk, men fiskiskapurin hjá partrolarum er smáligur.

Tað vita tey á Fiskamarknaði Føroya at siga.

Um djúpvatnstrolararnar verður sagt, at tveir ísfiskatrolarar eru á Íslandsrygginum, og báðir koma inn at landa í næstu viku.

- Ein fiskar á djúpum vatni og kemur eisini inn at landa í næstu viku. Teir fáa svartkalva, blálongu og annan djúpvatnsfisk.

Av teimum smáu trolbátunum eru tveir til fiskiskap. Teir fáa havtasku, tosk, hýsu, upsa og longu, og báðir koma inn at landa í næstu viku.

Trý garnaskip fiska svartkalva.

- Garnaskipini hava brúkiligan fiskiskap og koma øll inn at landa í næstu viku, siga tey á Fiskamarknaði Føroya.