Tey, sum ikki hava goldið skattin rættstundis, skulu framyvir eisini gjalda rentu av ógoldnari rentu.
Tað er ein av broytingunum í lógaruppskotinum hjá Akseli V. Johannesen, landsstýrismanni í fíggjarmálum, sum kemur til fyrstu viðgerð á tingi hósdagin.
Í dag verður renta ikki roknað av rentuni á írestandi skatti. Tað verður hon hinvegin longu av millum annað mvg-skuld og tollskuld. Við uppskotinum skulu reglurnar gerast eins.
Rentan verður eftir uppskotinum 0,7 prosent fyri hvønn byrjaðan mánað. Ógoldin renta verður sostatt løgd oman á skuldina, og síðani verður eisini renta roknað av henni.
Reglur frá 1894 skulu avtakast
TAKS umsitur í dag 51 lógir, og reglurnar um rentur og gjaldfreistir eru ymiskar. Nakrar lógir hava ongar rentureglur, meðan aðrar hava fleiri. Elsta lógin um innheinting er frá 1894.
Ætlanin er at savna reglurnar í eina lóg og avtaka fleiri av teimum gomlu lógunum.
Arbeiðið er partur av nýggju telduskipanini hjá TAKS, Kjarnanum. Einfaldari reglur skulu gera tað lættari at menna og reka skipanina og avgreiða fleiri mál sjálvvirkandi.
Sambært Fíggjarmálaráðnum er endamálið ikki, at landið skal fáa meira ella minni inn í rentum. TAKS væntar, at samlaði munurin verður lítil, men eingin neyv útrokning er gjørd. Fyri einstaka skuldaran kann broytingin tó fáa ymiskar avleiðingar, alt eftir hvør skuldin er.
Pant eftir sjey dagar
Vinnuhúsið tekur undir við at gera reglurnar einfaldari, men heldur tað vera stutta freist, at panting kann fremjast longu sjey dagar eftir seinasta rættstundis gjalddag.
Panting merkir, at TAKS tekur pant í ogn hjá skuldaranum sum trygd fyri skuldini.
Fíggjarmálaráðið vísir á, at sjey daga freistin longu stendur í rættargangslógini, og heldur tað vera rættast at hava somu freist í báðum lógum.
Vinnuhúsið eftirlýsir eisini eitt hámark fyri gjaldið fyri panting. Gjøldini verða tó varðveitt í uppskotinum.
Rentureglurnar bíða
Ætlanin er, at lógin fær gildi 1. januar 2027. Nýggju reglurnar um rentur og gjaldfreistir skulu tó ikki fáa gildi tá.
Tær skulu bíða, til viðkomandi partur av nýggju telduskipanini er klárur, og neyðugar broytingar eru gjørdar í hinum lógunum, sum TAKS umsitur. Uppskot um hesar fylgibroytingar skal eftir ætlan leggjast fyri tingið á vári 2027.
