Søga verður skrivað, tá ukrainski forsetin, Volodymyr Zelenskyj, í morgin umleið klokkan 11.35 fer at halda røðu í fólkatingssalinum á Christiansborg.
Tað sigur Henrik Frandsen, fólkatingsformaður úr Moderatunum, við TV 2 News týsdagin.
– Hetta er nakað heilt nýtt. Tað er fyrstu ferð, vit gera hetta. Tað er eitt framhald av, at vit seinastu árini hava latið meira upp, sigur hann við miðilin.
Henrik Frandsen leggur dent á, at avgerðin bert er galdandi fyri hesa einu vitjanina. Røðan verður heldur ikki hildin á einum fólkatingsfundi, men uttan fyri vanliga fundarvirksemið. Vanligur fólkatingsfundur er á skránni í morgin klokkan 13.
Formansskapurin í Fólkatinginum tók avgerðina mánadagin. Har sita fólkatingsformaðurin og fýra næstformenn, sum umboða teir fýra størstu flokkarnar í Fólkatinginum.
Hittir eisini føroysk umboð
Vitjanin hjá Zelenskyj í Fólkatinginum verður eftir ætlan frá klokkan 11 til klokkan 12 í morgin.
Umframt at halda røðu skal forsetin hitta formansskapin, floksleiðarar, formenninar í fólkatingsbólkunum og umboð fyri Føroyar og Grønland.
Zelenskyj vitjaði eisini Fólkatingið í august 2023, men tá helt hann ikki røðu í sjálvum fólkatingssalinum.
Norðurlendskir leiðarar til døgurða
Ukrainski forsetin kemur til Danmarkar týsdagin. Á skránni er millum annað eitt tvílandafundur í Forsætismálaráðnum á Christiansborg klokkan 13.45.
Har luttaka Mette Frederiksen, forsætisráðfrú, og fleiri danskir ráðharrar.
Klokkan 15 skal Zelenskyj saman við Mette Frederiksen taka lut í einari samrøðu á Københavns Universitet um verandi trygdarstøðu.
Týsdagin klokkan 18.15 verður arbeiðsdøgurði við ríkis- og stjórnarleiðarunum í Norðurlondum á Marienborg, sum er embætisbústaðurin hjá danska forsætisráðharranum.
Ukraina hevur verið í kríggi við Russland, síðani russiski forsetin, Vladimir Putin, gav boð um at gera innrás í grannalandið í 2022.
Ritzau
