Bert 15 dagar aftaná barnsburð var Natasja Hammer aftur á vøllinum, tá Stjarnan spældi dyst á útivølli í bestu íslendsku hondbóltsdeildini.

Í Set-høllini á Selfossi tapti Stjarnan greitt 22-29 fyri heimaliðnum, ið var á odda 13-10 í steðginum.

Inga Maria Roysdóttir skoraði fýra mál upp á sjey málroyndir, meðan Natasja Hammer megnaði at skjóta trý mál upp á tríggjar málroyndir. Inga Maria legði eisini upp til eitt mál, og hon vann liðnum eitt brotskast.

Stjarnan er aftast í deildini saman við HK. Liðini hava bert tvey stig.

Í KA-Heimilið høllini á Akureyri tapti liðið hjá Joan R. Johannesen og Agathu Kjærbæk, KA/Þór 24-30 fyri Fram, ið var á odda 14-10 í steðginum.

Joan skoraði trý mál upp á fýra málroyndir, og hon legði eisini upp til eitt mál.

KA/Þór er triðaftast í deildini við fýra stigum.