Um vikuskiftið hava B71-gentur í flogbólti luttikið í stórari kapping í Slagelse í Danmark. Vónirnar vóru so sum so, tá tær komu til Danmarkar, tí tær skuldu leika í A-bólkinum.
Men, B71-genturnar vístu í verki, at tær duga at spæla flogbólt, og tær duga at vinna eina stóra kapping - eisini í Danmark.
Tá semifinala og finala vórðu leiktar í dag, endaðu tær á fyrsta plássi og taptu bara eitt sett í allari kappingini tilsamans. Tær vunnu nevniliga spennandi finaluna á Ikast 2-1.
Tað vóru tveir bólkar í gentukappingini, harav B71 var í bólki við fýra øðrum liðum. Tær vunnu allar bólkadystirnar 2-0 - ávikavist ímóti Ikast, Gentofte, Flensburg og VKV úr Vestur Sælandi.
Í semifinaluni í dag vunnu tær 2-0 á Frederiksberg Volley, og finaludysturin var ímóti Ikast, sum tær høvdu vunnið 2-0 í bólkaspælinum í gjár.
Men, hetta gjørdist ein rættiliga spennandi finala, har øll trý settini gjørdust rættiliga jøvn, og B71-gentur endaðu við at vinna 15-13 í triðja og seinasta setti.
