U20-HM í íshokki hjá monnum verður kortini uttan russiska luttøku. Tað boðar altjóða íshokkisambandið, IIHF, frá við tilvísing til avgerðina hjá kanadisku stjórnini.
Kappingin verður í Kanada frá 26. desember til 5. januar og skuldi eftir ætlan verða fyrsta altjóða kappingin við russiskari luttøku, síðani Russland varð útihýst eftir innrásina í Ukraina í 2022.
Altjóða ítróttardómstólurin CAS gav síðst í oktober Russlandi viðhald í kæruni um útihýsingina. Kanadiski forsætisráðharrin, Mark Carney, gjørdi tó greitt, at russiska liðið hvørki fór at fáa loyvi at luttaka ella at koma inn í Kanada.
Noreg bíðar eftir svari
Norska íshokkisambandið boðaði 8. november frá, at Noreg skuldi lata Russlandi sítt pláss í kappingini. IIHF sigur í fráboðanini einki um, hvørt Noreg nú fær plássið aftur.
Petter Salsten, aðalskrivari í norska íshokkisambandinum, fegnast kortini um boðini. Hann sigur við norsku tíðindastovuna NTB, at óvissan seinastu tvær vikurnar hevur rakt spælarar, venjarar og foreldur, sum leingi hava fyrireikað seg til kappingina.
IIHF hevur heldur ikki boðað frá, hvat avgerðin merkir fyri aðrar kappingar í 2027. Týskland skal eftir ætlan vera vertur fyri A-HM í mai og hevur áður sagt, at landið fer at umhugsa at lata vertsskapin frá sær, um Russland skal luttaka.
Danmark, Svøríki, Noreg, Finnland, Lettland, Sveis og Kekkia hava áður boðað frá, at londini ikki vilja spæla móti Russlandi í altjóða meistarakappingum.
/ritzau/
