Seinnapartin vóru tveir dystir leiktir í Burn Mansdeildini.

Verandi greipuvinnararnir, H71 hildu stásið við líka við stórsigri á StÍF í høllini á Skála.

Dysturin endaði við 43-27 sigri til H71. Í steðginum vóru hoyvíkingar á odda 22-13.

Við sjey málum var Antoine Leclére Messebel toppskjútti hjá StÍF.

Boas Ellefsen á Skipagøtu fyllir 17 ár í komandi viku. Í dag var hann stórskjútti, og skoraði heili 13 mál fyri H71.

Í grannauppgerðini millum Neistan og Kyndil í høllini á Hálsi Norður var harafturímóti háspenningur. Dysturin endaði við javnleiki 25-25. Tað leikaði javnt á allan dystin. Í steðginum var eisini javnleikur. Tá var støðan 13-13.

Rói Berg Hansen var við 10 málum toppskjútti hjá Neistanum. Við sjey málum hvør vóru Teitur Poulsen Hellisdal og Filip Haldansen toppskjúttar hjá Kyndli.

H71 er fremst í deildini við fullum stigatali, 18 stigum. VÍF er næstfremst við 16 stigum. Kyndil hevur 11 stig, og KÍF og Neistin hava 10 stig hvør. EB hevur fýra stig, Team Klaksvík hevur tvey stig, og StÍF er aftast við bert einum stigi.

HER ber til frá HSF at síggja dómaraseðlarnar frá dagsins dystum í Burn Mansdeildini: