Ein litur av bensini kostar nú 15,04 krónur hjá Effo. Tað er ein lækking upp á 12 oyru, og 19 oyru bíligari, enn ein litur av bensini kostar hjá Magn í dag.
Seinastu vikuna hava bensin- og dieselprísirnir verið ymsir hjá báðum oljufeløgunum, sum er rættiliga óvanligt, tí vanliga ganga bara tímar ímillum, at annað oljufelagið tillagar prísin eftir hinum oljufelagnum.
Síðani russisku innrásina í Ukraina hava oljufeløgini í Føroyum broytt prísirnar umleið fjórða hvønn dag.
Ein litur av diesel hjá Effo kostar nú 13,86 krónur. Tað er ein lækking upp á 19 oyru fyri liturin. Og tað er 13 oyru minni enn hjá kappingarneytanum.
Eisini gassoljan, eisini nevnd húsarhaldsolja, er lækkað við 19 oyrum liturin. Ein litur av gassolju hjá Effo kostar nú 13,13 krónur, sum er 18 oyru bíligari, enn hjá Magn.
Magn plagar at broyta sínar prísir á midnátt, so hugsandi er, at prísir hjá Magn tá verða tillagaðir prísunum hjá Effo.