Í kvøld veit heimasíðan hjá The Maritime Executive at siga, at eldur er í einum stórum tangaskipi út fyri russiska frítíðarbýnum, Sotsji við Svartahavið.
Myndir og video-upptøkur á sosialum miðlum vísa eisini brennandi olju á sjónum, og heimasíðan heldur, at talan er um stóra oljutangaskipið, Aframax Rio.
Sum skilst, siglir skipið við russiskari olju frá terminalum í Eystursjónum og Svartahavinum til India og eystara part av Asiu. Aframax Rio er 247 metrar langt og 42 metrar breitt. Skipið, sum er bygt í Japan í 2004, lastar 777.000 føt av olju.
Sambært MarineTraffic er Aframax Rio einasta oljutangaskip í hesum øki, og seinasta knattastøðan hjá skipinum svarar til havleiðina, har skipið er, sum eldur nú er í.
Í løtuni er ógreitt, hvør orsøkin er til eldin.
Russiski krígsbloggurin, ExileNova+, skrivar, at hvørki loftávaring ella spreingingar vóru at hoyra, áðrenn eldurin kyknaði, og Ukraina hevur higartil ikki tikið ábyrgd av hendingini í Svartahavinum.
Sagt verður, at Aframax Rio siglir undir liberiskum flaggi. Ukraina setti í februar revsitiltøk í verk móti skipinum, tí illgruni var um, at skipið varð brúkt fyri at umgangast revsitiltøk móti Russlandi.
Sambært BlackSeaNews hevur tangaskipið fleiri ferðir siglt við russiskari olju úr russiskum havnum, og skipið hevur áður siglt undir fløggum hjá eitt nú Singapore og Panama.
