Drápsdømda kvinnan Christa Pike, sum hevur ligið í respiratori eftir eina miseydnaða avrætting, er nú við vit og kann tosa.

Tað siga verjar hennara í dag sambært fleiri amerikanskum miðlum.

– Ímóti øllum líkindum er Christa Pike við vit, tosar og fær framvegis lívsneyðuga læknaviðgerð. Hóast álvarsligu skaðarnar á ørmunum er hon framvegis í hondjørnum og leinkjað at songini.

– Støðan hjá henni er læknaliga uttan fordømi. Útlitini eru framvegis ógreið, men vit vænta í minsta lagi drúgva endurvenjing, siga verjarnir hjá 50 ára gomlu kvinnuni í eini fráboðan sambært tíðindastovuni Associated Press, AP.

Christa Pike skuldi verið avrættað mikudagin í síðstu viku. Hon varð í 1996 dømd til deyða fyri at hava dripið ein skúlafelaga árið fyri, eftir øllum at døma av øvundsjúku.

Men hóast hon fekk tvær innspræningar við pentobarbital, sum skuldu taka lívið av henni, yvirlivdi hon.

Seinastu vikuna hevur sjúkrahússtarvsfólkið roynt at bjarga lívi hennara og fáa pentobarbital úr kroppinum.

Guvernørurin í Tennessee, Bill Lee, hevur sagt, at avrættingarroyndin fylgdi ásettu mannagongdunum hjá statinum.

Hann hevur steðgað øllum avrættingum restina av 2026 og givið boð um eina óhefta kanning av tí, sum hendi.

Hetta er aðru ferð í ár, at ein avrætting miseydnast í Tennessee.

Í mai góvust starvsfólk í einum fongsli í statinum við eini avrætting, eftir at tey í meira enn ein tíma til fánýtis høvdu leitað eftir eini blóðæðr til deyðiligu innspræningina hjá deyðadømda Tony Carruthers.

Fongsulsstjórin í Tennessee fer úr starvi eftir miseydnaðu avrættingina av Christa Pike í síðstu viku.

Málið hevur vakt ans um allan heim og hevur í USA aftur kveikt kjakið um deyðarevsing.

Ritzau