Arbeiðið við at seta nýggju verjuavtaluna millum Grønland, Danmark og USA í verk byrjar av álvara í desember.
Tá skulu embætisfólk úr teimum trimum londunum hittast í USA fyri at umrøða, hvussu avtalan skal fremjast í verki.
Tað upplýsir Múte B. Egede, grønlendskur landsstýrismaður í uttanríkismálum.
Verjuavtalan varð undirskrivað í New York 22. september av Jens-Frederik Nielsen, landsstýrisformanni í Grønlandi, Mette Frederiksen, forsætisráðharra í Danmark, og Donald Trump, forseta í USA.
Inatsisartut góðkendi avtaluna fyrr í november, og Fólkatingið samtykti hana hósdagin 19. november.
Fleiri hernaðarligir møguleikar
Avtalan víðkar møguleikarnar hjá USA at hava hernaðarligt virksemi í Grønlandi.
Millum annað verður lagt upp til møgulig amerikonsk verjuøki við Narsarsuaq og Mestersvig.
Endamálið er sambært teimum trimum stjórnunum at styrkja felags verju og trygd í Arktis og Norðuratlantshavi.
Avtalan staðfestir samstundis fullveldið hjá danska ríkinum og rættin hjá grønlendska fólkinum til sjálvsavgerð.
Fyrsti fundur eftir góðkenningina
Fundurin í desember verður tann fyrsti millum partarnar, eftir at tær neyðugu tingviðgerðirnar eru avgreiddar.
Múte B. Egede sigur, at tað er gleðiligt, at arbeiðið nú kann koma víðari.
Hann vil tó ikki enn greiða frá, hvørji mál verða ovast á skránni á fundinum.
Danski uttanríkisráðharrin, Lars Løkke Rasmussen, hevur samstundis sagt, at tað framvegis er ógreitt, hvørjar ítøkiligar ætlanir amerikanararnir hava við teimum nýggju møguleikunum, sum avtalan gevur teimum.
Sambært honum hava partarnir ikki havt nýggjar ítøkiligar samráðingar um tvær møguligar herstøðir, síðani avtalan varð undirskrivað í september.
Ein føst nevnd við umboðum fyri partarnar skal viðgera slík mál.
Nýggja verjuavtalan er ein broyting og útbygging av verjuavtaluni um Grønland frá 1951.
Avtalan fevnir ikki um Føroyar.