Tað sigur hon í svari upp á skrivligan fyrispurning frá Fíu Selmu Nielsen, løgtingskvinnu, um orkudrykkir og fólkaheilsu.
Eyðdis Hartmann Niclasen vísir á, at bæði Heilsustýrið og Heilsufrøðiliga starvsstovan mæla børnum og ungum frá at drekka orkudrykkir.
Orsøkin er serliga høga innihaldið av koffeini og sukri. Hjá børnum og ungum kann hetta hava fleiri óhepnar avleiðingar.
Millum annað kunnu orkudrykkir føra til ilt í búkinum, høvuðpínu, ótta, hjartabankan, veðurlagssveiggjan, svøvnloysi og trupulleikar við at sovna.
Landsstýriskvinnan vísir eisini á, at lutfalsliga lága kropsvektin hjá børnum og ungum ger, at tey tola minni koffein enn vaksin.
Ein hálvur litur kann vera ov nógv
Í svarinum verður eitt ítøkiligt dømi nevnt:
Eitt barn, sum vigar 40 kilo – svarandi til umleið 11 ára aldur – eigur ikki at fáa meira enn 100 milligramm av koffeini um dagin.
Ein orkudrykkur á hálvan litur inniheldur vanliga umleið 160 milligramm av koffeini.
Tað merkir, at ein einstakur stórur orkudrykkur kann fara væl upp um ta mongdina, sum verður mett ráðilig fyri eitt barn av hesi stødd.
Vil kanna 18 ára aldursmark
Orkudrykkir koma undir matvørulóggávuna og eru tí málsøki hjá landsstýrismanninum í vinnumálum.
Eyðdis Hartmann Niclasen sigur, at hon fer at samskifta við landsstýrismannin í vinnumálum um, hvørji átøk kunnu setast í verk.
Millum møguleikarnar, sum skulu kannast, eru:
at seta 18 ára aldursmark fyri keyp av orkudrykkjum
at seta ávaringartekst á orkudrykkir
at fremja kunnandi átøk
Arbeiða eisini breiðari við fólkaheilsuni
Fía Selma Nielsen spurdi eisini, um landsstýrið ætlar at styrkja føroysku fólkaheilsuna hjá børnum og ungum.
Landsstýriskvinnan vísir á, at arbeitt verður á fleiri økjum við hesum. Hon nevnir millum annað fyribyrging av rúsevnamisnýtslu, heilsufremjandi arbeiði í skúlunum, Gigni og samstarv millum Heilsustýrið og Heilsu- og orkumálaráðið um fólkaheilsuátøk.
Hon heldur tó ikki, at tað er neyðugt við eini serstakari ætlan bara fyri barna- og ungdómsheilsu.
Heldur eigur fólkaheilsan hjá børnum og ungum at vera ein týðandi partur av samlaða arbeiðinum við at styrkja fólkaheilsuna.
