Bretska løgreglan fekk klokkan 00.45 í nátt fráboðan um trý illgrunasom akfør, sum koyrdu móti floghernaðarstøðini Fairford í Gloucestershire.

Støðin verður brúkt av amerikanska herinum, og seinastu dagarnar eru trygdartiltøkini har herd.

Fimm menn vórðu handtiknir í morgun. Sambært Metropolitan Police eru teir undir illgruna fyri at hava fyrireikað eitt yvirgangsálop. Teir eru eisini undir illgruna fyri brot á lóggávuna um spreingievni.

Í býnum Whelford vórðu 85 ognir tømdar í morgun, og løgreglan hevur sperrað eitt øki í 400 metra radius kring tey trý akførini.

Spreingievnissérfrøðingar hjá bretska herinum kanna nú akførini, meðan løgreglan arbeiðir saman við bretsku antiterrorløgregluni um málið.

Eitt eygnavitni sigur við Reuters, at vápnað løgregla hevur sperrað høvuðsinngongdina til flogstøðina. Umleið 30 neyðakfør eru á staðnum, teirra millum løgreglubilar, sjúkrabilar og sløkkiliðsbilar.

Sambært Reuters hevur bretska stjórnin áður givið amerikanska herinum loyvi at brúka Fairford-støðina til álop á iransk rakettmál, sum hava verið brúkt í álopum á skip í Hormuz-sundinum.

Í juli segði Bretland, at herurin var klárur at verja landið móti møguligum álopum, eftir at iranska Revolutiónsverjan hevði ávarað Bretland móti at lata amerikansk bumbuflogfør flúgva úr Fairford.