Landsliðsliðskiparin, Ásla Johannesen og liðfelagarnir í Piteå vóru í dag fyri einum afturstigi í stríðnum at koma longri burtur frá teimum aftastu plássunum í bestu svensku fótbóltsdeildini, Damallsvenskan.
Í útidystinum móti Rosengård hevði Piteå javnleik 0-0 til átta minuttir vóru eftir av vanligu leiktíðini. Tá skoraði Rosengård sigursmálið í dystinum.
Ásla var í vøllinum í 87 minuttir, og hon hevur higartil tikið lut í øllum 20 dystunum Piteå hevur spælt í Damallsvenskan í hesum kappingarárinum.
Piteå er nummar níggju í deildini við 23 stigum. Tær hava sjey stig niður til næstaftasta plássið, har IFK Norrköping hevur 16 stig. Tvey tey aftastu liðini í deildini flyta beinleiðis niður aftaná lokna kapping. Triðaftasta liðið spælir upp- og niðurflytingardystir móti triðfremsta liðnum í næstbestu deildini.
Komandi leygardag klokkan 13 hevur Piteå dyst á LF Arena leikvøllinum í Piteå móti IFK Norrköping, og har kann Piteå við heimasigri leggja veruligan sjógv millum seg og aftastu liðini.
