Samuel Chukwudi og liðfelagarnir í SV Ried eru ósigraðir í teimum seinastu fimm dystunum í bestu eysturríksku fótbóltsdeildini.

Í dag gjørdist talan um javnleik 2-2 á útivølli móti Sturm Graz.

Tá hálvur tími var leiktur av dystinum legði heimaliðið seg á odda. Men beint undan steðginum javnaði Philipp Pomer fyri Ried við einum brotssparki, og í støðuni undan brotssparkinum fekk heimaliðið ein leikara riknan av vøllinum. Seinni hálvleikur var tíggju minuttir gamal, tá Isaac Thelin legði Ried á odda 2-1. Tíverri megnaði heimaliðið at javna til 2-2 í tíðini dómarin hevði lagt aftrat.

Hjá Samuel gjørdist talan um eitt gott avrik. Fyri leikliga avrikið fær Samuel frá Flashscore karakterin: 7,5, og frá Sofascore 7,2 (av 10 møguligum).

SV Ried er nummar fimm í deildini við 15 stigum.

Mikukvøldið klokkan 19.30 spælir SV Ried áttandapartsfinalu í steypakappingini á útivølli móti LASK.