Bretar eiga at læra av Føroyum, tá ið støða skal takast til framtíðar ferðasambandið í Hetlandi.

Tað er ein av niðurstøðunum hjá skotsku nevndini í bretska undirhúsinum, sum hevur lagt fram eina frágreiðing um fast samband til skotsku oyggjarnar.

Sambært Shetland News heldur nevndin, at tunlar til oyggjar sum Yell, Unst og Whalsay kunnu tálma fráflyting, bøta um lívskorini og skapa betri grundarlag undir vinnulívinum.

Nevndarlimir vitjaðu í Føroyum í mars í ár fyri at kanna, hvussu føroysku tunlarnir eru fíggjaðir og bygdir.

Í frágreiðingini verður dentur lagdur á, at føroysku íløgurnar fyrst og fremst eru gjørdar fyri at gagna samfelagnum. Betri samband hevur sambært nevndini havt týdning fyri at varðveita og menna búsetingina.

Yell fyrst – síðani Unst

Hetlendsku myndugleikarnir hava raðfest ein tunnil til Yell fremst. Síðani kemur sambandið til Unst.

Skotska stjórnin hevur sett 23 milliónir pund av til fyrireikandi arbeiði næstu árini, men fíggingin til sjálva byggingina er enn ikki komin upp á pláss.

Bretska tingnevndin heldur, at stjórnin í London eigur at viðgera møguleikarnar fyri at stuðla verkætlanunum, eitt nú við lánum og ábyrgdum.

Samstundis verður ávarað um, at óálítandi ferjusamband leggur stórar avmarkingar á gerandisdagin hjá oyggjabúgvum og raksturin hjá fyritøkum.