Í Føroyum og í londunum kring okkum verður hvørt ár varpað ljós á bróstkrabba í oktober mánaða. Átakið kallast ljósareyður oktober og Krabbameinsfelagið vísir í hesum sambandi á týdningin av arbeiðinum móti sjúkuni.

Í Føroyum vísa hagtøl, at 10. hvør kvinna verður rakt av bróstkrabba.

Í nøkur ár, hava føroyskar kvinnur í aldursbólkinum 50-69 ár, fingið bjóðað mammografikanning, annaðhvørt ár.

Sama tilboð er í hinum Norðurlondum, tó so at Ísland og Svøríki hava víðkað aldursbólkin, soleiðis at allar kvinnur í aldrinum 40-74 ár fáa tilboð um kanning.

Fakfólk eru ikki á einum máli um aldursmarkið, men vísindaligar kanningar benda á, at tað gevur úrslit, at bjóða yngri kvinnum kanning.

Ruth Vang, forkvinna í Framsókn, hevur í hesum sambandi spurt Eyðdis H. Niclasen, landsstýriskvinnu í heilsumálum, um ætlanir eru um at víðka um aldursbólkin og um so er, hvat tað hevði kostað at lækka aldursmarkið niður í 45 ella 40 ár.