Føroyingar eru framvegis teir mest virknu á arbeiðsmarknaðinum í Evropa, sambært seinastu tølunum frá Hagstovu Føroya.
Í november í fjør vóru 32.757 fólk í føroysku arbeiðsmegini. Tað svarar til 84 prosent av øllum føroyingum í aldrinum 15 til 74 ár.
Hetta er hægsti vinnutíttleiki í Evropa.
Nú fer Hagstova Føroya undir árligu arbeiðsmegikanningina, sum verður gjørd í døgunum 15. til 20. november.
Tilsamans 1.300 tilvildarliga vald fólk fáa høvi at luttaka í kanningini, sum skal geva eina dagførda mynd av føroyska arbeiðsmarknaðinum.
Serliga nógvar kvinnur arbeiða í Føroyum
Seinastu kanningarnar hava víst, at føroyski vinnutíttleikin er hægri enn í øðrum evropeiskum londum í nærum øllum aldursbólkum.
Men tað er serliga ein munur, sum ger seg galdandi.
Lutfalsliga fleiri kvinnur eru á arbeiðsmarknaðinum í Føroyum enn í Íslandi, Danmark og ES-londunum.
Hetta er sambært Hagstovuni ein høvuðsorsøk til, at føroyski vinnutíttleikin er so høgur samanborið við onnur lond.
Arbeiðsleys telja eisini við
Tá Hagstovan ger arbeiðsmegina upp, verða bæði tey, sum eru í arbeiði, og tey, sum eru arbeiðsleys, tald við.
Vinnutíttleikin vísir sostatt, hvussu stórur partur av fólkinum í arbeiðsførum aldri er á arbeiðsmarknaðinum, og ikki bert hvussu nógv hava eitt starv.
Kanningin verður gjørd eftir altjóða leiðreglum frá International Labour Organization (ILO), sum er arbeiðsstovnurin hjá Sameindu Tjóðum.
Tað ger tað møguligt at samanbera føroyska arbeiðsmarknaðin við arbeiðsmarknaðin í øðrum londum.
Grafikkur: Hagstovan
1.300 fólk verða spurd
Flestu fólk verða skrásett sum arbeiðsvirkin ella arbeiðsleys við støði í almennum skráum.
Av teimum, sum eftir eru, verða 1.300 fólk vald til at svara spurningum.
Tey, sum hava Mínboks, kunnu svara kanningini á netinum. Hagstovan fer eisini at ringja til fólk, sum ikki hava Mínboks, ella sum ikki hava svarað talgilt.
Telefonnummarið, sum Hagstovan ringir frá, er 352828.
Við nýggju kanningini fæst at vita, um føroyingar framvegis hava hægsta vinnutíttleikan í Evropa, og um gongdin á føroyska arbeiðsmarknaðinum heldur fram.
Kelda: Hagstova Føroya.