Løgreglan kannar framvegis málið um eina PlayStation, sum varð boðin til sølu á Facebook. Ein keypari flutti 3.500 krónur, men eingin PlayStation var á adressuni, sum keyparin hevði fingið, upplýsir løgreglan.
Næsta stig hjá løgregluni er at tosa við bankan fyri at kanna, hvar pengarnir eru farnir. Sambært løgregluni samsvara upplýsingarnar um, hvar pengarnir fóru, ikki við navnið á Facebook-profilinum.
Løgreglan hevur tosað við mannin, hvørs navn stóð á profilinum. Hann er ein veruligur persónur, og løgreglan kannar, um navn hansara er brúkt á einum følskum profili. Maðurin er ikki skuldsettur.
Løgreglan hevur fingið eitt annað navn, sum hon fer at kanna nærri. Málið er framvegis undir kanning.