Føroyska toskakvotan á Flemish Kap minkar 650 tons

Føroyska toskakvotan á Flemish Kap minkar 650 tons Føroyska toskakvotan á Flemish Kap minkar 650 tons

Føroyski parturin av toskakvotuni á Flemish Kap er 22,35%. Tískil verður okkara partur 2.783 tons í 2027 samanborið við 3.433 tons í 2026

Vilmund Jacobsen

28. september 2026 kl. 22:37

Ársfundurin í NAFO (Northwest Atlantic Fisheries Organization) varð hildin í Vilnius í Litava í døgunum 21.-25. september 2026.

- Støddin á toskastovninum á Flemish Kap hevur verið skiftandi, síðan latið varð upp aftur fyri fiskiskapi í 2010. Limalondini eru samd um at lata toskastovnin koma fyri seg við at hava eitt varligt veiðitrýst.

Í uttanríkis-og fiskimálaráðnum verður víst á, at nýggja fyrivarnismeginreglan vísir, at stovnurin er minkaður, og størri varsemi krevst í fiskiskapinum.

Fyri at tryggja, at veiðan framhaldandi skal vera burðardygg, mælti NAFO-Vísindaráðið til at lækka mest loyvdu veiðu (MLV) millum 19%-34%.

- NAFO-limalondini samdust um at áseta MLV til 12.452 tons fyri 2027, sum er ein lækking á 18,9%.

Sostatt gjørdist toskakvotan tann hægst møguliga sambært vísindaliga tilmælinum.

Føroyski parturin av toskakvotuni er 22,35%, og verður føroyski parturin sostatt 2.783 tons, samanborið við 3.433 tons í 2026.

- Smærru kvoturnar av svartkalva og kongafiski eru ávikavist 182,8 tons og 69 tons komandi ár, verður sagt í uttanríkis-og fiskimálaráðnum.

Føroyska sendinevndin var mannað við umboðum úr uttanríkis- og fiskimálaráðnum, Vørn, Havstovuni, Føroya Reiðarafelag og Felagnum Línuskip.