Atlantic Airways hevur fingið eina stóra viðurkenning í donsku ferðavinnuni.
Føroyska flogfelagið varð mikukvøldið 7. oktober kosið besta leiguflogfelag í Danmark á árligu virðislønarhandanini Danish Travel Awards, sum varð hildin í Cirkusbygningen í Keypmannahavn.
Atlantic Airways vann í bólkinum Bedste charterflyselskab, har Sunclass Airlines gjørdist nummar tvey og SAS nummar trý.
Tað skrivar danska ferðavinnumiðilin Standby.dk.
Byggir á metingar hjá ferðafólkum
Danish Travel Awards er ein afturvendandi virðislønarhandan, har bestu fyritøkurnar innan ferðavinnu, flogferðslu og gisting verða heiðraðar.
Virðislønirnar byggja á eina kanning, sum greiningarfyritøkan Epinion hevur gjørt millum meira enn 3.000 danskar brúkarar.
Luttakararnir hava mett um ferðavinnufyritøkur við støði í egnum upplivingum seinastu 24 mánaðirnar.
Í fjør var tað Sunclass Airlines, sum vann virðislønina fyri besta leiguflogfelag.
Lítið flogfelag við stórum uppgávum
Atlantic Airways fegnast um viðurkenningina og hevur á sosialu miðlunum takkað starvsfólkunum fyri teirra arbeiði.
Flogfelagið vísir á, at hóast Atlantic Airways er eitt lítið flogfelag í altjóða høpi, hevur tað stóra ábyrgd og týðandi uppgávur.
Leiguflúgving er vorðin ein týðandi partur av virkseminum hjá Atlantic Airways.
Umframt vanligu rutuflúgvingina til og úr Føroyum flýgur felagið eisini fyri útlendskar ferðaskrivstovur, serliga úr Danmark til ferðamál í Suðurevropa.
Hetta ger tað møguligt at gagnnýta flogførini betur, tá tey ikki verða brúkt til rutuflúgvingina.
Sambært ársfrágreiðingini hjá Atlantic Airways fyri 2025 er leiguflúgvingin ein týðandi partur av arbeiðinum at betra um lønsemið hjá felagnum.
Á virðislønarhandanini í Keypmannahavn vóru Irdi Debes, Agnar Jensen, Nancy S. Justinussen og Andrias Sólsker til staðar vegna Atlantic Airways.
Við nýggju virðislønini hevur føroyska flogfelagið sostatt vunnið eina kapping, har tað varð mett fram um tvey væl kend flogfeløg á danska marknaðinum.
Keldur: Standby.dk, Atlantic Airways og Danish Travel Awards.
