Í minsta lagi eitt fólk er dripið í russiskum loftálopi á Ukraina í nátt, og hetta var í býnum, Zaporizjzja.
Tað sigur virkandi guvernørurin í økinum, Mykhailo Semikin, á boðtænastuni, Telegram, og tað er Reuters, sum endurgevur.
Sagt verður eisini, at fleiri fólk eru særd í russiska álopinum.
Seinastu dagarnar eru rættiliga nógv sivilfólk dripin í Ukraina, og eitt nú hava russar lopið á tveir bussar við sivilfólki, har mong lótu lív.
Tíðindastovan NTB veit annars at siga, at ein ukrainsk sendinevnd í dag fer at hava samrøður við amerikanska forsetan, Donald Trump í USA.
Kelda til hesi tíðindi er ukrainski forsetin, Volodymyr Zelenskyj.
Sum skilst á forsetanum, skulu partarnir serliga umrøða støðuna við russisku loftálopunum á Ukraina.
Volodymyr Zelenskyj sigur seg vænta, at evropeiskir samstarvspartar eisini verða við í samrøðunum teir næstu dagarnar.
