Fyritøkurnar, sum menna vitlíki, eiga í størri mun sjálvar at seta reglurnar fyri virkseminum, heldur enn at myndugleikarnir gera tað.
Tað sigur amerikanski forsetin, Donald Trump, eftir ein miðmálafund í Hvítu Húsunum í dag við leiðarar í fleiri av heimsins størstu tøknifyritøkum.
Trump og fyritøkuleiðararnir hava undirskrivað eina avtalu, sum forsetin lýsir sum eitt slag av verju.
Spurdur, um avtalan er løgfrøðiliga bindandi, svarar hann:
– Hon er moralskt bindandi, haldi eg.
Avtalan er enn ikki almannakunngjørd. Mike Johnson, formaður í Umboðsmannatinginum, váttar eisini, at hon varð undirskrivað týsdag.
Umhugsa eitt eftirlitsnevnd
Trump heldur, at fyritøkurnar innan vitlíki longu í stóran mun hava eftirlit við sínum egna virksemi.
Hann leggur tó afturat, at stjórnin umhugsar at seta eina nevnd, sum kann hava eftirlit við nýggju tøknini.
Jensen Huang, stjóri í chipframleiðaranum Nvidia, sigur eftir fundin, at hann ikki sær nakra mótsetning millum nýskapan, tøkni og trygd.
– Vit vilja fara fram á ein ábyrgdarfullan og tryggan hátt, sigur hann.
Á fundinum vóru millum onnur Jeff Bezos, Mark Zuckerberg úr Meta, Sundar Pichai úr Google og Elon Musk. Eisini leiðarar úr OpenAI, Anthropic, Microsoft og Nvidia luttóku saman við politiskum leiðarum úr Kongressini.
Óttast at tapa kappingina við Kina
Útmeldingin kemur, samstundis sum trýstið í amerikansku Kongressini fyri strangari eftirliti við AI-vinnuni veksur.
Mike Johnson sigur, at neyðugt er at finna røttu javnvágina millum nýskapan og eftirlit.
Í eini samrøðu við Fox Business Network mánadagin ávaraði hann ímóti at steðga menningini fyribils ella seta ov strangar reglur.
– Vit hava ikki tørv á at fara undir at yvirregulera hetta, tí so tapa vit kappingina við Kina, segði hann.
Stúra fyri størvum og stórum dátumiðstøðum
Amerikanskir politikarar eru undir trýsti frá veljarum, sum vilja hava størri tamarhald á menningini.
Stúranin snýr seg millum annað um, at vitlíki kann koma í staðin fyri menniskjaliga arbeiðsmegi og fáa stórar samfelagsligar avleiðingar. Eisini er ótti fyri, at AI-skipanir kunnu fara at virka uttan menniskjaligt eftirlit.
Sambært Ritzau/AFP hevur OpenAI nýliga biðið um umbering fyri, at ein AI-agentur hjá felagnum framdi eitt hakkaraálop á eina avstralska myndugleikaheimasíðu.
Stóru dátumiðstøðirnar, sum tøknin krevur, elva eisini til ónøgd. Í fleiri lokalsamfeløgum stúra fólk fyri hækkandi elrokningum, stórari vatnnýtslu og tørvinum á lendi.
Málið er vorðið eitt stríðsevni hjá báðum flokkum í valstríðnum undan amerikanska miðskeiðsvalinum.
Ritzau/AFP
