Fert tú á ólavsøku í ár? 
- Tað vænti eg. Fyri fyrstu ferð eigi eg føroysk klæði, so tey fari eg í á ólavsøku.
Tað sigur Rannva Vesturklett.
Hvussu heldur tú ólavsøku?    
- Tað er ymiskt. Haldi ikki, at eg havi nakað ávíst, sum eg skal til ella síggja, men ein túrur niðan í KFUM hoyrir ólavsøkuni til. 
Hon vísir á, at okkurt árið var hon ikki heima.
- Í 2020, tá korona var, hildu vit og vinfólk hjá okkum ólavsøku í kampingvogni í Vági. Hetta var ein sera góður túrur. 
Hvat er tað besta við ólavsøkuni?   
- Tað besta er at møta fólki og lurta eftir tónleiki. 
Er onkur serlig ólavsøka, tú minnist?   
- Tann seinasta var sera vát. Tað regnaði so illa, at hugurin at fara oman í býin var lítil og eingin. 
Kundi okkurt verið øðrvísi við ólavsøkuni? 
- Nú havi eg ikki smábørn longur, men mær dámdi betur, tá tivoli var í kommunuskúlagarðinum, sigur Rannva Vesturklett.