Síðani fyrstu steypafinalurnar í hondbólti í 1985 hava steypafinalurnar vunnið sær stóra hevd í Føroyum.

Annan ella triðja leygardagin í februar klokkan 13.30 og klokkan 16 hava finalurnar hjá kvinnum og monnum verið á skránni, og finalurnar í yngri deildunum hava verið á skránni sama vikuskiftið. Hetta er alt farið fram í høllini á Hálsi í Havn. 

Men hesaferð verður fyrstu ferð, at finalurnar hjá kvinnum og hjá monnum ikki vera leiktar sama dag.

Framúr góðu og søguligu avrikini hjá H71-kvinnum í Europa Cup kappingini hava við sær, at H71 skal leika fjórðingsfinalur móti sterka ukrainska liðnum, Lviv á útivølli sunnudagin 13. februar klokkan 12, og sunnukvøldið 20. februar klokkan 20, dagin eftir steypafinaluna hjá monnum.

Leygardagin 26. februar eru steypafinalurnar í flogbólti. Leygardagin 5. mars spælir føroyska kvinnulandsliðið EM-undankappingardyst móti Eysturríki í høllini á Hálsi. Leygardagin 12. mars eru fleiri næmingar hjá Glasi, har ímillum spælarar hjá H71 á námsferð. Tí hevur HSF valt leygardagin 19. mars sum dagin tá H71 skal spæla steypafinalu móti antin Stjørnuni ella Kyndli.

HSF sigur, at tey fara at arbeiða fyri, at eitt samanfall millum steypafinalur og luttøku í evropeiskari kapping ikki kemur fyri aftur. Í HSF ynska tey, at føroysk feløg melda til evropeiskar kappingar, og vinna seg so langt í teimum kappingunum sum til ber. 

HSF metir eisini, at 19. mars er tann dagfestingin sum ger minst inntriv í SMS-deildina, landskappingina hjá kvinnum.