Tað endaði við 2-1 sigri til gestirnar, tá ið Víkingur í kvøld var á Svangaskarði. Sigurin ber við sær, at Víkingur hevur saman við B36 38 stig, og tað eru trý stig fram til HB, sum er á bronsuplássinum. Víkingur hevur longu tryggjað sær pláss í Europa. Tað gjørdi Víkingur við at vinna finaluna um løgmanssteypið ímóti KÍ.

Tapið í kvøld ber við sær, at tað eftir øllum at døma ikki verður sunnudagsfótbóltur á Svangaskarði í 2027. B68 hevur 17 stig, og nú tað resta trý umfør eru tað seks stig frá B68 og fram til áttanda plássið.

Sunnudagin fer B68 til Klaksvíkar, í næstsíðsta umfari verður mótstøðuliðið 07 Vestur í Sørvági, og í síðsta umfari fær B68 vitjan av NSÍ.

Tað hevur áður verið striltið hjá Rana Hansen at vinna sær pláss millum teir fyrstu ellivu hjá Víkingi. Nú eru fleiri av teimum farnir av landinum, sum oftast hava verið millum teir fyrstu ellivu. Jóhan Petur Poulsen hevur tí givið Rana Hansen, og í kvøld takkaði hann av álvara fyri. Rani Hansen legði í 21. minutti Víking á odda eftir innlegg úr vinstru frá Inga Jonhardsson.

Og tá ið Jørgen Nielsen eitt korter undan leikloki skoraði 2-1 sigursmálið var tað Rani Hansen, sum átti uppleggið.

B68 stríddist fyri lívinum, men tað eydnaðst ikki at vinna stig. Miðskeiðis í seinna hálvleiki eydnaðist tað at javna til 1-1. Uppleggið átti Ahmed Latif, og tað var Karstin Clementsen, sum skoraði við høvdinum. Hann var fyrr í ár nógv skaðadarvaður, men í heyst hevur hann verið nógv á liðnum, og í kvøld var hann málskjútti fyri aðru ferð í ár.

Avrikið hjá toftamonnum var fínt eftir steðgin, og um tað verður hildið fram í sama stíli, so kann tað fara at geva okkurt stigið aftrat. Trupulleikin hjá B68 er, at tað bara eru trý umfør eftir, og at míllum mótstøðuliðini eru bæði oddaliðini - KÍ og NSÍ.