223.713 fólk hava valrætt í Dalarna, og umleið 190.000 teirra atkvøddu á ríkisdagsvalinum. Nú verður kannað, um ólóglig ávirkan kann hava havt týdning fyri úrslitið í valdøminum.

Málið snýr seg um umstøðurnar kring, hvussu Mohamed Abdukardir Ali úr Vänsterpartiet varð valdur inn í Riksdagin. Ein ákæri kannar málið, og sambært Aftonbladet er illgruni um brot í sambandi við valið.

Andreas Johansson Heinö, stjórnmálafrøðingur, sigur við Aftonbladet, at um møgulig valsvik hava havt slíkan týdning, at úrslitið ikki kann rættast á annan hátt, kann talan verða um umval í øllum valdøminum.

– Um eg lesi lógina rætt, skal umval vera í valdøminum, um svikið ikki kann rættast á annan hátt, sigur hann.

Men tað er langt frá avgjørt, at so verður.

Erik Wångmar, stjórnmálafrøðingur við Linnéuniversitetið, vísir á, at um málið bara snýr seg um persónligar atkvøður til eitt ávíst valevni, er ivasamt, um tað hevði ført til umval.

Um kanningin hinvegin vísir, at ólóglig ávirkan eisini hevur havt týdning fyri, hvønn flokk fólk hava valt, kann støðan verða ein onnur. Í einum slíkum føri metir hann, at eitt møguligt umval kundi verið hildið á vári ella summar 2027.

Málið verður viðgjørt í tveimum ymiskum sporum. Annað er revsirættarliga kanningin hjá ákæruvaldinum, hitt er ein møgulig kæra til svenska Valprövningsnämnden, sum kann taka støðu til, um valið skal ógildast heilt ella partvíst.

Sambært svenskari vallóg kann Valprövningsnämnden áseta umval, um óreglusemi ella ólóglig ávirkan hevur verið í sambandi við valið, og mistakið ikki kann rættast á annan hátt.

Kelda: Aftonbladet/TT