Á árligu Ferðavinnustevnuni, sum varð hildin á Hotel Hafnia fríggjadagin, vórðu tveir heiðrar handaðir fyri serlig avrik í føroyskari ferðavinnu.
KG Hotel í Klaksvík varð kosið Ársins átak 2026.
Í grundgevingini legði dómsnevndin dent á dirvið, nýhugsanina og tær stóru íløgurnar, sum liggja aftanfyri hotellið.
Dómsnevndin heldur, at KG Hotel hevur skapt nýggjar møguleikar í ferðavinnuni og givið ferðavinnuni í økinum nýtt lív.
Serliga verður víst á, at hotellið sameinir framkomnar hentleikar, vælveru og føroyska náttúru í einum nýggjum ferðavinnutilboði.
Sambært dómsnevndini er KG Hotel meira enn bara eitt nýtt hotell. Tað verður mett sum eitt nýbrot, ið kann styrkja ferðavinnuna í økinum.
Gunnar Skúvadal heiðraður
Ársins ferðavinnufólk 2026 gjørdist Gunnar Skúvadal.
Hann fekk heiðurin fyri sítt drúgva og ótroyttiliga arbeiði við at menna føroyska ferðavinnu.
Í grundgevingini verður víst á, at Gunnar Skúvadal hevur megnað at knýta føroyska søgu, mentan, matupplivingar og náttúru saman í fjølbroytt ferðavinnutilboð.
Hann verður eisini róstur fyri at hava verið við til at skapa og varðveita eitt livandi ferðavinnuumhvørvi.
Dómsnevndin metir, at hansara arbeiði hevur havt stóran týdning fyri menningina av ferðavinnuni og fyri upplivingarnar hjá gestum í Føroyum.
Í dómsnevndini sótu Henny á Líknargøtu fyri Ferðavinnufelagið, Guðrið Højgaard fyri Visit Faroe Islands og Annika Lisberg fyri kunningarstovurnar.
Tað er Ferðavinnufelagið, sum skipar fyri árligu heiðursbrævhandanini.
