Finnland og Noreg høvdu einki nýtt at leggja á borðið, tá leiðarar teirra í dag tosaðu í telefon við Vladimir Putin, russiska forsetan.

Tað sigur Sergej Lavrov, russiskur uttanríkisráðharri, sambært russisku tíðindastovuni Interfax, skrivar Reuters.

Lavrov heldur, at evropeisku londini í grundini royna at fáa ein leiklut í samráðingunum. Hann sigur eisini, at kunningarkríggið um Ukraina fer at halda fram og helst herðast.

Útsøgnin kemur, eftir at tað fyrr í dag kom fram, at Alexander Stubb, forseti í Finnlandi, og Jonas Gahr Støre, forsætisráðharri í Noregi, hava havt eina felags telefonsamrøðu við Putin.

Danmark og Svøríki finnast at

Samrøðan hevur fingið blandaða móttøku millum sameindu londini.

Mette Frederiksen, danska forsætisráðfrúan, hevur sagt við DR, at samrøðan ikki var samskipað við hini londini. Hon hevur funnist at Noregi og Finnlandi fyri at fara egnar leiðir.

Eisini Ulf Kristersson, svenskur forsætisráðharri, hevur víst sítt ivasemi.

– At hava samrøður, sum kunnu elva til kloyving í felags evropeisku røddini, er vandamikið, segði hann týsdagin sambært svenskum miðlum.

Støre vísir atfinningunum aftur

Jonas Gahr Støre vísir tó atfinningunum aftur.

– Vit tosa ikki vegna onnur enn okkum sjálv. Men vit hava ráðført okkum gjølla, og allir okkara samstarvsfelagar og sameindu vórðu kunnað frammanundan og hava eisini fingið eina gjølliga frágreiðing aftaná, sigur hann við norska miðilin VG.

Úr Ukraina er móttøkan jaligari.

Volodymyr Zelenskyj, ukrainskur forseti, skrivar á X, at hann er takksamur fyri virkna diplomatiska arbeiðið hjá Noregi og Finnlandi.

Ritzau