Liðið hjá Óla Mittún, GOG vann eisini á svenska liðnum, Kristianstad á heimavølli í innleiðandi bólki D í Champions League.
Í dystinum í Arena Svendborg vann GOG í kvøld 39-30 á Kristianstad. Í steðginum var GOG á odda 22-17.
Óli var effektivur. Hann skoraði fýra mál upp á fýra málroyndir, og hann legði eisini upp til trý mál. Seinasta partin av dystinum valdi venjarin at spara Óla, tá sigurin tyktist vera í pottinum.
GOG hevur seks stig fyri fýra dystir, og teir eru fyribils fremst í bólkinum. Sporting Lissabon hevur fimm stig og Szeged hevur trý stig. Kristianstad er aftast, og teir hava enn fyrsta stigið til góðar.
Klokkan 19.45 byrjar dysturin í Lissabon millum Sporting og Szeged.
Sunnudagin klokkan 15 er aftur dystur í Arena Svendborg. Tá tekur GOG móti Kolding í dysti í bestu donsku hondbóltsdeildini.
