Brasilska forsetavalið kann fáa avgerandi týdning fyri, um fólkaríkasta landið í Sðuramerika eisini fer tann politiska høgravegin, sum fleiri lond í økinum hava valt seinastu tíðina.
Donald Trump, forseti í USA, hevur fegnast um hesa gongdina.
Úr bygdum langt inni í Amazonas-regnskóginum til landbúnaðarøkini har suðuri og tættbygdu fátækrabýlingarnar í stórbýunum skulu brasilianar velja millum tvey sera kend eftirnøvn.
Hin 80 ára gamli vinstravendi Lula roynir at verða valdur til eitt fjórða og seinasta valskeið sum forseti. Undan valinum hevur hann ávarað um, at brasilska sjálvræðið er í vanda vegna trýst frá Donald Trump.
Men Lula fær harða kapping frá 45 ára gamla høgravenda senatorinum Flavio Bolsonaro.
Hann er sonur fyrrverandi forsetan Jair Bolsonaro, sum situr ein 27 ára langan fongsulsdóm fyri eina miseydnaða roynd at fremja stjórnarkvett í sambandi við valið í 2022.
Annað valumfar væntandi
Sambært nýggjastu veljarakanningunum fær hvørgin av teimum báðum fremstu valevnunum tey 50 prosentini av atkvøðunum, sum skulu til fyri at vinna í fyrra valumfar.
Tí verður roknað við, at annað og avgerandi valumfarið verður sunnudagin 25. oktober.
Valstríðið hevur verið merkt av gølum og persónligum álopum heldur enn politiskum uppskotum og lyftum.
Lula hevur kallað Bolsonaro ein týdningarleysan persón, sum ikki eingongd hevði verið skikkaður til eitt starv sum húsavørður.
Bolsonaro hevur roynt at víst seg sum hóvligari enn stríðshugaði pápin. Hann hevur afturímóti kallað Lula ódugnaligan.
– Brasil orkar teg ikki longur, hevur Bolsonaro sagt við Lula undir valstríðnum.
Flavio Bolsonaro á veljarafundi í Rio de Janeiro leygardagin. Høgravendi senatorurin er sonur fyrrverandi forsetan Jair Bolsonaro, sum er dømdur fyri eina miseydnaða roynd at fremja stjórnarkvett. (Mynd: Douglas Shineidr/Ritzau Scanpix)
Trump sæst aftur í valstríðnum
Lula gjørdi politiskt comeback í 2022. Áðrenn tað hevði hann sitið meira enn 18 mánaðir í fongsli í sambandi við eitt stórt mutursmál.
Dómurin varð ógildaður í 2021 vegna feil í rættargongdini.
Í triðja forsetaskeiði sínum hevur Lula millum annað sett sosialar hjálparskipanir í verk aftur og avmarkað oyðingina av Amazonas-regnskóginum.
Donald Trump hevur eisini havt ein sjónligan leiklut í brasilska valstríðnum. Myndir av amerikanska forsetanum og amerikonsk fløgg hava verið sjónlig á veljarafundum hjá Bolsonaro.
Flavio Bolsonaro hevur víst seg at vera ein álvarsamur avbjóðari hjá sitandi forsetanum. Tað er hóast, at hann verður kannaður fyri møguligt mutur í sambandi við fíggingina av filminum Dark Horse, sum snýr seg um pápa hansara.
Bolsonaro hevur lovað at stramman fíggjarpolitikk og at seta hart inn móti kriminaliteti.
Brasilski veljarin skal í dag ikki bara velja forseta. Eisini skulu guvernørar, 513 limir í Undirhúsinum og 81 limir í Senatinum veljast.
Ritzau/AFP
