Noah Mneney hevur á fyrsta sinni fingið landsliðsboð. Tað hendir eftir, at Hallur Hansson hevur givið avboð til landsliðið, sum sunnukvøldið skal spæla móti Turkalandi.

Hallur Hansson hevur fingið ein álvarsligan skaða í knæið, sum ger at liðskiparin á landsliðnum má sita yvir í upp til eitt ár. Vónin var, at talan var um lítlan skaða og tí bleiv hann úttikin til landsdystin móti Litava. Skanningar hava síðani víst, at talan er um álvarsaman skaða.

Í hansara stað er komin miðvallarin hjá Víkingi, Noah Mneney. Hann hevur verið at kalla fastur maður á miðvøllinum hjá Víkingi seinastu trý árini, og hevur verið fastur maður á U21-landsliðnum. Hann er 19 ára gamal og skifti til Víking frá ÍF í 2019.

Liðfelagin í Víkingi, Sølvi Vatnhamar, er tøkur aftur eftir leikbann. Tí verður Noah Mneney 24. maðurin í hópinum, og tað kunnu verða 23 spælarar á dómaraseðilinum. Føroyar spæla sunnukvøldið klokkan 19.45 móti Turkalandi í seinasta dystinum í Nations League higartil.