Nú verða stig tikin til at fara undir at projektera Kalsoyartunnilin. Tað sigur Jacob Vestergaard, landsstýrismaður í vinnumálum, við Kringvarpið.

Ætlanin er, at partafelagið Norðoyatunnilin skal standa fyri arbeiðinum og eisini fíggja projekteringina, skrivar Kringvarpið.

Til tess er neyðugt at broyta lógina um Norðoyatunnilin. Landsstýrismaðurin ætlar tí í heyst at leggja eitt lógaruppskot fyri Løgtingið.

Sambært Jacob Vestergaard hevur Norðoyatunnilin pening tøkan til projekteringina.

Talan er sostatt um at fyrireika tunnilsverkætlanina. Í tíðindunum hjá Kringvarpinum verður eingin tíðarætlan nevnd fyri sjálva byggingina.