Evropeiski fylgisveinurin Sentinel-3C hevur sent fyrstu myndirnar av jørðini. Tær vísa millum annað Italia, arktisku oyggjarnar í Kanada og øki kring Kuba og Bahamaoyggjarnar.

Fylgisveinurin varð sendur upp 15. september og er partur av Copernicus, jarðeygleiðingarskipanini hjá ES.

Sambært evropeiska rúmdarstovninum ESA vísa fyrstu úrslitini, at tólini virka væl. Fylgisveinurin verður tó framvegis royndur og stillaður, og væntandi ganga umleið fimm mánaðir, áðrenn hann verður tikin í fullan rakstur.

Mátar eisini ísin í Grønlandi

Umframt myndir hevur Sentinel-3C sent mátingar av hæddini á innlandsísinum í Grønlandi og av havflatinum í Atlantshavinum og Miðjarðarhavinum.

Mátingarnar skulu hjálpa granskarum at skilja, hvussu ísurin broytist, og at meta um framtíðar broytingar í havstøðuni.

Sentinel-3-fylgisveinarnir eygleiða millum annað hitan og litin á havinum, havstøðuna og tjúkdina á havísinum. Á landi verður fylgt við turki, skógareldum og gróðri.

Upplýsingarnar verða brúktar bæði í veðurforsagnum og til at fylgja við veðurlagsbroytingum.