Noreg og Svøríki taka væl ímóti trygdar- og verjuavtaluni, sum Danmark, Grønland og USA undirskrivaðu týsdagin.

Norski uttanríkisráðharrin, Espen Barth Eide, sigur við tíðindastovuna NTB, at talan er um eina týdningarmikla avtalu. Hon er úrslit av góðum diplomatiskum arbeiði frá øllum pørtum, sum hevur fingið samráðingarnar á rætta kós.

– Avtalan byggir á samstarv og staðfestir fulla og óavmarkaða fullveldið hjá danska ríkinum og rættin hjá Grønlandi at gera av sína egnu framtíð, sigur hann.

Donald Trump, amerikanskur forseti, Jens-Frederik Nielsen, grønlendskur stjórnarleiðari, og Mette Frederiksen, donsk forsætisráðfrú, undirskrivaðu avtaluna í ST-bygninginum í New York.

Nato kann savna seg um aðrar uppgávur

Espen Barth Eide leggur dent á, at avtalan hevur týdning fyri samstarvið í Nato.

– At Nato nú kann leggja Grønlandskreppuna aftur um seg er týdningarmikið, so samgongan kann savna seg um týdningarmestu uppgávurnar í samstarvinum tvørtur um Atlantshavið, eitt nú Ukraina og býtið av byrðunum í Nato, sigur hann.

Virkandi svenski uttanríkisráðharrin, Maria Malmer Stenergard, bjóðaði eisini avtaluni vælkomnari í einum uppslagi á sosiala miðlinum X týskvøldið.

– Svøríki er framvegis fult og heilt sinnað at arbeiða saman við øllum okkara sameindu fyri at styrkja felags trygdina, skrivar hon.

Avtalan loyvir millum annað USA at stovna nýggj verjuøki við Narsarsuaq og Mestersvig í Grønlandi.

Hon skal nú leggjast fyri tjóðartingini í Grønlandi og Danmark til endaliga góðkenning.

Finnland sá fram til undirskrivingina

Eisini Finnland tók jaliga ímóti gongdini í samráðingunum.

Í eini fráboðan, sum finska uttanríkisráðið kunngjørdi týsdagin undan undirskrivingini, segði uttanríkisráðharrin, Elina Valtonen, at Finnland sá fram til, at avtalan varð undirskrivað.

– Seinasta gongdin í samráðingunum millum Danmark, Grønland og USA er jalig. Væntaða avtalan fer at styrkja samstarvið um at fremja støðufesti í arktiska økinum, segði hon.

/ritzau/