Turkisblátt hav, grønar oyggjar og ljósir sandbankar mynda eitt sermerkt mynstur á nýggju fylgisveinamyndini, sum Copernicus hevur valt til dagsins mynd.

Myndin vísir smáoyggjarnar – nevndar cays á enskum – kring Isla de la Juventud sunnan fyri kubanska meginlandið.

Isla de la Juventud, sum merkir Ungdómsins oyggj, er næststørsta oyggin í Kuba. Hon er partur av Los Canarreos-oyggjabólkinum í Karibiahavinum.

Økið er kent fyri grunt og klárt hav, korallriv, mangrovu og nógvar smáar sandoyggjar. Liturin á sjónum broytist eftir dýpinum og botninum. Ljósastu økini vísa grunt hav og sandbotn, meðan myrkari bláu litirnir vísa djúpari sjógv.

Strendurnar á sunnaru síðu oynna hava fínan, hvítan sand, og havið kring oynna er ríkt í korallum, sjódjórum og ymiskum fiskasløgum.

Eygleiða jørðina úr rúmdini

Copernicus er jarðeygleiðingarskipanin hjá ES. Sentinel-fylgisveinarnir í skipanini taka myndir og savna upplýsingar um millum annað hav, lendi, veður, náttúruvanlukkur og broytingar í umhvørvinum.

Dagsins mynd hjá Copernicus verður almannakunngjørd fyri at vísa, hvussu fylgisveinaupplýsingar kunnu geva innlit í náttúruna og broytingarnar á jørðini.