Fólk hjá amerikansku bjargingartænastuni leita út fyri strondini á oynni, Nantucket í amerikanska statinum, Massachusetts.

Vraklutirnir, sum eru funnir, eru frá einum saknaðum sjúkraflutningsflogfari.

- Flogfarið við seks fólkum hvarv yvir Atlantshavinum í gjár á veg úr Bermuda til Boston, upplýsir amerikanska bjargingartænastan.

Sagt verður, at í flogfarinum vóru fýra fólk úr Kanada og tvey úr Bermuda. Tey avvarðandi hava fingið boðini um flogvanlukkuna.

Sambært bjargingartænastuni mistu loftferðslumyndugleikarnir sambandið við flogfarið, sum var eitt jetflogfar við tveimum motorum av slagnum, Gulfstream G100.

Hetta hendi tíðliga gjáramorgunin, og ljóðupptøkur frá flogleiðsluni benda á, at flogfarið fleyg inn í eitt illveður á leiðini.

- Flogskiparin segði frá trupulleikum við el-skipanini, og hann legði aftrat, at tey vóru í einari neyðstøðu, tá flogfarið nærkaðist landi, vita amerikanskir miðlar at siga.

Sum skilst, hevur amerikanska bjargingartænastan funnið leivdir av flogfarinum á leiðini, har leitað verður.