Føroyska U19-landsliðið hevur spælt triðja og seinasta venjingardystin á ferðini í Slovenia.

Fyrrapartin spældi liðið móti Sameindu Arabisku Emirríkjunum. Landið sum er upphavið til tað Manchester City vit kenna í dag.

Føroyar taptu 2-4. Emirríkini løgdu seg á odda í 14. minutti. Markus Klein Danielsen javnaði til 1-1 eitt korter seinni. Emirríkini løgdu seg á odda 2-1 stutt undan steðginum. Bert tveir minuttir vóru leiktir av seinna hálvleiki, tá Ezra Lukama javnaði fyri til støðuna 2-2. Men bert seks minuttir seinni høvdu Emirríkini bæði lagt seg á odda 3-2, og høvdu økt til 4-2. Hesaferð megnaðu okkara ikki at svara aftur.

Á venjingarleguni taptu Føroyar heiðurliga 1-2 fyri vertslandinum, Slovenia og vóru fyri stórtapi 0-5 í fyrsta dystinum móti Írlandi.

Dagarnar 11. til 17. november skal U19-landsliðið taka lut í undankapping í B-liguni.

Mótstøðuliðini tá vera Serbia, Montenegro og Aserbadjan.