Tað er trupult at fáa eyga á batar í samgonguskjalinum millum Fólkaflokkin, Sambandsflokkin og Javnaðarflokkin, tá umræður livikorini hjá lágløntum pensjónistum.

Í samgonguskjalinum verður boðað frá, at markið fyri mótrokning skal hækkast upp í 300.000 krónur, og samstundis skal mótrokningarprosentið hækka upp í 30 prosent. Og skulu arbeiðsmarknaðargjøld eisini rindast av arbeiðsinntøku hjá pensjónistum.

Hetta uppskot um mótrokning gagnar einans pensjónistum, sum eru høgtløntir og ikki teimum mongu, sum bert hava lága pensjón, og lága arbeiðsinntøku ella lága privata pensjón at liva av.

Mótrokningin átti heldur at verið broytt soleiðis, at hon ístaðin kann gagna stórum tali av fólkapensjónistum, ið hava lága inntøku.

Beint fyri løgtingsvalið kom Jørgen Niclasen, løgtingsmaður fyri Fólkaflokkin, við uppskoti um at hækka mótrokningina í fólkapensjónini úr 61.900 krónum upp í 102.600 krónur. 

Um tílíkt uppskot til mótrokning varð sett í verk, vildi tað hjálpt einum hópi av lágløntum fólkapensjónistum, sum soleiðis høvdu fingið meira pening at liva av.   

Teir pensjónistar, ið bert ella nærum bert hava fólkapensjón og samhaldsfasta at liva av, hava tørv á at fáa eina eykaviðbót ella eldrakekk líknandi donsku skipanini.

Somuleiðis eiga fyritíðarpensjónistar, sum fáa pensjón, ið liggur undir fátækraváðamarkinum, eisini at fáa ein eykaviðbót afturat fyritíðarpensjónini, ið lyftir teir upp um fátækraváðamarkið.

Í samgonguskjalinum verður sagt, at fyribils tiltøk verða sett í verk at lætta um hjá fólki, nú oljuprísirnir eru hækkaðir munandi og matvøruprísirnir eru vorðnir sera høgir.

Fráboðaði oljustuðulin eigur at verða settur í verk, hetta ongantíð ov skjótt.

Áhugabólkur Pensjónista