Hvussu rakar verandi skattskipan pensjónistar, láglønt og aðrar borgarar við avmarkaðum inntøkum?

Tað vil Sámal Petur í Grund vegna Sjálvstýri hava lýst í eini frágreiðing. Í uppskoti til samtyktar, dagfest 22. september, verður heitt á landsstýrið um at kanna, hvussu kommunu- og landsskatturin ávirkar hesar bólkar.

Frágreiðingin skal eisini hava ítøkilig tilmæli um, hvussu skattaskipanin kann gerast meira rættvís, serliga fyri pensjónistar og lág- og miðallønt.

Í viðmerkingunum til uppskotið verður serliga víst á kommunuskattin. Uppskotsstillarin heldur, at skipanin við einum føstum skattaprosenti rakar fólk við lágum inntøkum serliga hart.

Hann samanber við Danmark, har persónsfrádráttur og javningarskipanir sambært viðmerkingunum hava við sær, at fólk við lágum inntøkum rinda minni í kommunuskatti.

Eisini verður víst til tøl frá Hagstovu Føroya. Sambært tølunum, sum verða endurgivin í uppskotinum, eru 51,8 prosent av støkum fólkapensjónistum í fátækraváða.

Sámal Petur í Grund heldur, at hetta krevur politiska atgerð. Hann metir skattaskipanina vera eina týðandi orsøk til, at nógv eldri og láglønt hava trupult við at fáa endarnar at røkka saman.

Uppskotið ásetur ikki ítøkiligar skattabroytingar. Endamálið er at fáa eina gjølliga kanning og tilmæli um broytingar, sum kunnu bøta um fíggjarligu støðuna hjá teimum, ið hava minst at liva av.