Russlandsserfrøðingurin, Inna Sangadzieva, sigur, at valúrslitið í Russlandi vísir, hvussu lítið er eftir av møguleikunum hjá fólki í Russlandi at ávirka tað, sum hendir í landinum, men hóst hetta, so royna fólk at ávirka.

Russar hava nú sett sín kross. Tíggju flokkar stillaðu upp til val, og sambært forsagum fara seks av hesum flokkum at fáa umboð í russisku Duma'ini.

Hóast valúrslitið ikki verður kunngjørt fyrr enn í fyrsta lagi hin 25. september, er eingin ivi um, at russiski forsetin, Vladimir Putin, fer at halda fram at stýra landinum. Flokkur hansara - Sameint Russland - liggur til at fáa stívliga 50 prosent av atkvøðunum.

- Russland er vorðið eitt einaveldi, sigur Inna Sangadzieva við norska Tv2.

Hon situr í Helsingforsnevndini og er serfrøðingur í russskum viðurskiftum. Hon sigur, at valúrslitið í Russlandi er ikki eftirfarandi.

Fyri at finna út av, hvat vanligi russarin heldur, og hvat fólk halda um russiska forsetan, brúkar Inna Sangadzieva aðrar keldur.

- Russar kunnu ikki við sínari atkvøðu vísa, hvat teir halda um russisku krígsførsluna í Ukraina, tí einasti flokkur, sum legði upp til friðarsamráðingar, slapp ikki at stilla upp. Hetta var ein avgerð, sum Hægstirættur í Russlandi tók.

Inna Sangadzieva vísir á, at Jabloko-flokkurin í fyrstu syfti fekk loyvi at stilla upp, men síðan misti flokkurin rættin at stilla upp.

- Tá fólk eru spurd, um tey vildu havt stuðlað hesum flokki, um flokkurin slapp at stilla upp, søgdu 18-25 prosent, at tað høvdu tey gjørt. Hetta er i tí Russlandi, vit hava í dag. So, í veruleikanum kundi undirtøkan fyri flokkinum verið enn størri, sigur russlandsserfrøðingurin.

Hon vísir eisini til spurnarkanningar, sum triðja hvønn mánað hava verið í Russlandi, og her siga fleiri enn 60 prosent av russum, at tey ynskja friðarsamráðingar og eina friðaravtalu.

- Tað eru eins nógv, sum eru troytt av krígnum og ynskja, at kríggið heldur uppat, sigur hon. Eftir at hava fylgt flokkinum hjá Putin, Sameint Russland og forsetanum sjálvum, sigur hon, at hvørki flokkurin ella forsetin sjálvur eru populer, sum hon tekur til.

Inna Sangadzieva sigur seg slett ikki trúgva almennu tølunum, sum vísa, at flokkurin hjá Vladimir Putin fær fleiri enn 50 prosent av atkvøðunum.

- Alt hetta er "kunstugt", sum hon tekur til, og eg vil meta, at tað eru í mesta lagi 20 prosent av fólkinum, sum stuðla russiska forsetanum, sigur russlandsserfrøðingurin og limurin í Helsingforsnevndini.

Hon leggur aftrat, at fleiri politikarar eru fongslaðir, og fleiri liva í útlegd, eins og nógvir ivaspurningar hava verið við valinum, har valeftirlitsfólk eru víst burtur.