Tvey føroyingalið vóru í leiki í kvøld í bestu íslendsku mansdeildini í hondbólti.

Allan Norðberg, Bjarni í Selvindi og liðfelagarnir í Vali vunnu á útivølli 41-31 á Víkingi Reykjavík. Í steðginum var Valur á odda heili 26-13, og tí var ráð til at slaka nakað í seinna hálvleiki.

Allan skoraði fýra mál upp á seks málroyndir, og Bjarni skoraði tvey mál upp á tríggjar málroyndir. Bjarni legði eisini upp til fimm mál.

Valur er fjórðfremst við átta stigum fyri seks dystir. Haukar eru fremst í deildini við 12 stigum.

Stjarnan við Tóka Fríðrikssyni og Jóhannes Bjørgvin á liðnum vann á heimavølli í Heklu-høllini 35-33 á KA. Í steðginum var Stjarnan á odda 17-14.

Tóki skoraði trý mál upp á tríggjar málroyndir, og Jóhannes skoraði eitt mál upp á eina málroynd.

Stjarnan er nummar sjey í deildini við fimm stigum.