Føroyar kunnu fáa fyrsta veruliga illveðrið í heyst mikudagin. Tað vísir nýggjasta metingin hjá Veðurstovu Føroya, sum Hanus Kjølbro hevur lagt fram í dag.

Talan er um lágtrýstið Isaias, sum tók seg upp yvir Meksikoflógva fyri fimm døgum síðani. Tað hevur longu elvt til skaðar í Florida og Alabama við nógvum vindi, vatnflóð og stórum regnnøgdum.

Nú kann sama lágtrýst taka leiðina móti Føroyum.

Sambært framrokningunum í morgun verður lágtrýstið millum Føroyar og Ísland seinnapartin mikudagin. Tá kann trýstið í miðjuni vera komið niður um 960 hPa.

Mesti vindurin verður sunnan fyri miðjuna á lágtrýstinum, og sambært verandi forsøgnum er tað júst hetta økið, sum fer yvir Føroyar.

Veðurstovan metir, at miðalvindurin kann liggja um 15 til 20 metrar um sekundið og í støðum koma upp í 23 metrar um sekundið. Hvirlurnar kunnu vera hálva aðru til tvær ferðir so harðar sum miðalvindurin.

Fær nýggja orku á havinum

Vanliga doyggja tropisk lágtrýst, tá ið tey koma inn yvir land. Men Isaias sær út til at megna at halda fram eystureftir og koma út yvir Atlantshavið aftur.

Har kann tað fáa nýggja orku og halda leiðina móti okkara leiðum.

Fyrstu dagarnar væntast lágtrýstið at dýpast spakuliga, meðan tað flytur seg skjótt eystureftir. Týsdagin, tá ið tað er sunnan fyri Flemish Cape, væntast tað at dýpast munandi skjótari.

Hanus Kjølbro leggur tó dent á, at enn eru næstan fimm dagar til mikudagin, og nógv kann broytast.

Forsagnirnar røkka fýra til fimm dagar fram, og tá kann óvissan vera stór. Tí er enn ikki vist, at illveðrið rakar Føroyar.